Là sö dóe gh’è i montagne del Signùr
ol Giani, de consèrva, amò l’ pedala
passì passì e bèl löster de südùr,
sèmper sènsa calsì e, in del cöntàla,
lü l’ parlerà de cambe e de rapórcc,
de sòste che per lü i éra tép mórcc.

Pò ach a’ la sö, co la sò bici d’ córsa
a l’ sarà dré a fà ‘l gir del Paradìs
pò dòpo a l’ farà pò a’ chèl de l’Órsa,
l’ se alenerà col cambe a scat fis
sura Saturno, sura chi anèi
compàgn del sò Mosèr e i sò fradèi.

Sènsa Mosèr, che l’ éra la sò féde,
a l’ parlerà de córse col Mosè;
ai àngei a l’ ghe spiegherà ‘l riméde
per fà d’investimèncc, se amò ghe n’è
coi bune assiù d’la zét fàle frötà
compàgn che l’ fàa lü coi sò paisà.


(1994 Colle Gallo – primo anniversario
della morte di Gianni Vecchi)


Amleto