Amò i s’ è dàcc la us, dal vólt al bass,
per chèsto apuntamènt sö sto traguàrd
indóe che i biligòrnie i tróa la pas
e dóe che s’ vèd ol mónd co ün óter sguàrd
e dóe che adès i è dré a gudìl in dù:
ol Giani (urmài de cà) e ol Gervasù.

Amò ‘n de l’aria i è i nòste orassiù
e l’ gira amò ‘l sentùr di nòs-cc pensér
ch’ i è dré a galesà cóme aquilù
próncc a ciapà precìs ol giöst sentér
de chèsto vias che l’ pórta drécc precìs
pròpe là sö indóe i è i nòs-cc amìs.

Urmài no gh’ è paròle piö de scrìv,
urmài no gh’ è poesie de cantà
perchè chèsto ricòrd l’ è franch e viv
e pò a’ perchè pò a’ lur che i è sö là
i sà che ògne an e sènsa fal
a gh’ è sto apuntamènt ché al Còl del Gal.

No l’ è che stó per dì ön’eresìa
se dìghe che, per mé, chèsta giornada
per regordà öna memoria ìa,
de st’an la pöl sensóter èss ciamàda,
con töt ol giöst rispèt per ol dulùr,
la fèsta del ricòrdo sò de lur.