Ave o Maria, màder del Signùr,
che te protèget chèi ch’ i à ‘n biciclèta
infolarmàcc compàgn di curidùr,
col casco, in braghì e tat de maglièta,
che i pórta ‘n giro per i mucc e vai
chèsta passiù che la tramónta mai.

Ave o Maria, piéna de ògne grassia,
te préghe fà che ‘l nòst diertimét
no l’ gh’ àvie mai de indà a finì ‘n disgrassia;
làssega cór col còrp e co la mét
e fà che mai a m’ perde la resù
col mètess in del có de fà i campiù.

Santa Maria, Madóna del Ghisàl,
màder del Signùr, sciura di sime;
Madóna de la niv, del Còl del Gal,
regina di ciclisti e di regine:
tègnega d’öcc, té che te sét la stèla
de nóter töcc, de nóter sfregasèla.